Ginpahayag sang Department of Energy (DOE) nga posible magapadayon ang rollback sa presyo sa produkto sang petrolyo kun padayunon man sang Estados Unidos ang pagpataas sang interest rate.
Suno kay DOE-Oil Industry Management Bureau Director Rino Abad, kun igaduso sang US Federal Reserve paagi sa hiking ang interest rate sa policy meeting sa Hulyo 26 tubtob Hulyo 27, mahimo man nga sundon sang iban nga central banks sa kalibutan ang pagsulundan.
Ginpahayag man ni Abad nga kun pataason sang U.S. Fed kag sang iban nga bangko ang ila interest rates, mangin “global action” ini sa diin dako ini nga pabor agud mag-padayon ang rollback.
Gin-eksplekar naman ni Abad nga ang rollback sa sini nga semana ang bangud sa intermittent lockdowns sa China kag pagpataas sang interest rates sang U.S. kag sang iban nga pungsod nga nag-resulta sa tempered economic activity nga nagpanubo sang demand kag presyo.
Nahibaluan nga ang interest rates ang isa sa mga tools nga gina-usar sang central banks agud ma-stabilize ang inflation paagi sa pagkontrol sang money supply sa pagpataas sang borrowing costs.
