Kinahanglan nga liwat maghiwat sang localized peace talks ang gobyerno matapos nagtaliwan na ang CPP-NPA-NDF founder nga si Joma Sison.
Ini ang kabahin sang panawagan ni Sen. Ronald “Bato” Dela Rosa.
Suno sa iya, tion na ini para i-balik ang peace talks sa pag-panguna sang mga local chief executives sa mga lugar nga may yara sa gihapon sang presensya sang makawala nga gropo sa diin sila ang makighinun-anon sa mga ground commanders.
Nadumduman nga naghiwat sadto sang on-off talk ang Duterte administration sa mga communist rebels.
Nag-isyu man sadtong Nobyembre 23 tuig 2017 si former President Rodrigo Duterte sang Proclamation 360 nga naga-deklarar sang terminasyon sa peace negotiations sa mga rebelde. Iya man gin-anunsyo ang March 2019 bilang “permanent termination of our talks between the government panel and the Communist Party of the Philippines.”
Suno naman kay Dela Rosa, si Sison lang ang “stumbling block” sa local peace talks bangud indi sini luyag nga madulaan sang kontrol sa field units kag ang mga local commanders naman ang ginakulbaan nga pamatbatan sang sanctions.
Samtang, sadtong bulan sang Hunyo sini nga tuig, ginpahayag ni Sison nga bukas sya para sa peace talks, apang nagpahayag naman si National Security Adviser Clarita Carlos nga indi paglauman nga may matabo nga negosasyon sa idalum sang Marcos Administration.
Nadumduman nga nagtaliwan si Sison sadtong Disyembre 16 sa Utrecht, Netherlands bangud sa heart failure.
