Prayoridad sa karun ni Senate Committee on Energy Vice Chairman Senator Sherwin Gatchalian nga mahatagan sang bastante nga pondo ang National Power Corporation (NAPOCOR) agud makabakal sang krudo kag malikawan ang lapnagon nga power outages tuig 2023.
Ini kasunod sa pahayag sang NAPOCOR nga dako ang posibilidad nga maka-eksperyensya sang lapnagon nga power interruptions kun indi madugangan ang ila pondo.
Nahibaluan nga ₱32.2 billion ang mabaton sang NAPOCOR matapos ginbuhinan sang Department of Budget and Management (DBM) ang pondo nga ila ginpangayo sa ₱12.5 billion.
Suno sa government-owned corporation, ang pagbuhin sa ila pondo ang maka-resulta sa pag-shutdown sang 278 ka planta sa katapusan nga bulan sang Hulyo sa masunod nga tuig bangud ang bulan sang Enero kag Hulyo lang ang cover sang budget para sa diesel fuel.
Samtang, kapin 1.3 million naman ka households ang maapektohan sang power outages sa masunod nga tuig pananglitan indi mahatagan sang solusyon ang budget issue sa NAPOCOR.
