Natukiban sang mga senador nga indi otorisado nga maglayag ang MT Princess Empress, ang naglugdang nga tanker nga nangin tuna-an sang oil spill malapit sa Verde Island Passage, Oriental Mindoro.
Base sa incident report sang Maritime Industry Authority (Marina), wala sang authority nga mag-operate ang MT Princess Empress pinaagi sang amendment sang certificate of public convenience (CPC) nga gin-issue sang RDC Reield Marine Services sa domestic trade.
Ginkumpirmar ni Marina administrator Hernani Fabia ang nasambit nga report.
Suno kay Fabia, gina-isyu ang CPC sa kompanya sa diin nalista ang mga vessels kag kinahanglan sang amendments kun may madugang nga barko.
Dugang pa niya, may pending application ang RDC bangud kulang sa documents kag wala sa gilayon na-isyuhan.
Gin-ako man sang opisyal sang RDC Reield Marine Services nga ang nasambit nga barko ang naglayag sang siyam ka beses antes ini naglugdang sang Pebrero 28.
