ILOILO CITY- Nagpatuman sang temporary ban ang Department of Agriculture sa pag-import sang poultry products gikan sa Japan, Hungary kag California bangud sa pamahog sang bird flu.
Sa ginpaguwa nga DA memorandu orders no. 69, 70 kag 71 nga napetsahan Nobyembre 23 kag pirmado ni Undersecretary Domingo Panganiban, ginadumili anay ang pag-import sang domestic kag wild birds lakip na ang karne sang mga ini, mga pisu, itlog kag semilya gikan sa nasambit nga mga lugar ukon pungsod.
Gilayon man nga ginsuspender sang DA ang pag-proseso, evaluation sang application kag pag-isyu sang Sanitary and Phytosanitary import clearance para sa nasambit nga mga produkto.
Subong man, ginpahayag sang DA nga ang shipments gikan sa Japan kag Hungary nga nag-abot kag nabaton na sa mga puwerto antis pa napaguwa ang memorandum orders ang pasugtan nga makasulod basta ang mga produkto ang gin-ihaw antis ang Oktubre 12, 2022.
Samtang, ginpahayag sang United Broilers Raisers Association ukon UBRA nga indi maapektuhan ang Pilipinas sang temporary ban bangud may bastante ini nga supply sang manok tubtub sa adlaw sang Paskuwa.
