ILOILO CITY — Ginpanginwala sang abogado ni Negros Oriental Representative Arnolfo “Arnie” Teves Jr. ang pahayag sang mga nadakpan nga suspek nga si a certain “Cong Teves” ang mastermind sa pagpatay kay Negros Oriental Governor Roel Degamo.
Suno kay Atty. Ferdinand Topacio, huring-huring lamang ini kag wala man sang may naghambal sa mga suspek nga nakaistorya nila mismo si Cong. Teves kag ginmanduan sila nga patyon ang gobernador.
Ginhatagan pagtamod ni Topacio nga wala sang direkta nga ebidensya nga naga-angot kay Teves, nga yara sa luwas sang pungsod kag naka-extended leave sa House of Representatives, sa natabo nga assassination sang Marso 4.
Madumduman nga gintumod ni Joric Labrador, isa sa mga naaresto nga suspek sa pagpatay kay Degamo, nga si a certain “Marvin” ang nag-recruit sa ila nga maghimo sang assassination kag ginhambalan sila nga si “Cong Teves” ang nagmando.
Samtang, nagpanawagan naman si Topacio sa otoridad nga maglantaw man sa iban nga anggulo sa pagpatay kay Degamo kag indi magtutok lang sa isa ka tawo.
Ginpabilin naman nga confidential sang abogado kun bala yara sa gihapon si Teves sa Estados Unidos ukon yara na sa Asya nga una ginpahayag ni Justice Secretary Jesus Crispin “Boying” Remulla.
Dugang pa sini nga nakahibalo si Speaker Martin Romualdez nga iya nakasugilanon sang Miyerkules kun sa diin subong si Teves.
Itugyan nalang sini kay Romualdez ang amu nga butang.
