ILOILO CITY- Nagpanawagan si Vice-President Sara Duterte sa mga pumuluyo sang Eastern Samar nga pakigbatu-an ang lokal nga terorismo kag magtukod sang disaster-resilient communities.
Ginhimo sang Bise-presidente ang panawagan sa iya pagpamulong-pulong sa ika-57 nga founding anniversary sang Eastern Samar kon sa diin ginpahayag sini nga nagapabilin nga nagatindug sang mabakod ang probinsya sa pihak nga masami ini gina-igo sang kalamidad kag problema sini sa insureksyon.
Angut sini, gin-engganyo si VP Sara nga amo man sang Secretary sang Department of Education ang mga ginikanan nga indi pagpasugtan ang ila mga kabataan nga magsulod sa terorista nga grupo agud indi maguba ang ila buwas damlag.
Samtang ginpahayag man sini nga kinahanglan nga magbuligay ang gobyerno kag mga pumuluyo kag iban pa nga stakeholders agud makatukod sang disaster resilient community.
