UPDATE | Ginbawian na sang kabuhi si Rey Togonon, 56-anyos kag residente sang Baranagy Pulao, Dumangas sang natiruhan ini sa dughan sang suspek sang tinalikdan nga Huwebes, Oktubre 13, 2022.
Sa interview sang Radyo Bandera Iloilo kay Police Senior Master Sergeant Kim Jhon Banzon, investigator-on case sang Dumagas Municipal Police Station, ginbawian na sang kabuhi ang biktima sa Western Visayas Medical Center, las-9:31 sa gab-e sang Oktubre 13 kag nagsungka naman sa karon ang suspetsado sa nasambit nga presinto.
Ginkilala ang suspetsado kay Vemilo Gustilo, 60-anyos kag residente sang nasambit nga lugar.
Suno kay PMSgt. Banzon, nangin rason sang insidente ang daan nga hiligut-anon ang sang suspek kag biktima bangud napatay ni Togonon ang utod ni Gustilo.
Nahibaluan nga napreso man ang biktima sang 17 ka tuig sa kaso nga murder kag nakaguwa na ini kag nagbalik sa ila barangay.
Sa karun yara na si Gustilo sa kustodiya sang Dumangas Municipal Police Station kag napasakaan na sang kaso nga murder.
