Nagdangat sa ₱714,000 ang narekober nga droga sa duha ka persona sa ginpatigayon nga drug buy-bust operation sang Philippine National Police Drug Enforcement Group- Special Operation Unit 6 kag Special Drug Enforcement Team- Iloilo City Police Station 2 (Lapaz Police Station) sa Zone 3, Brgy. Lopez-Jaena Norte, La Paz, las 2 sini nga hapon, Oktubre 19.
Ginkilala ang subject person nga si Nestor Magno Jr., 38 anyos kag utod sini nga si Alcen Magno, gibanta yara sa 40 ang edad kag lunsay residente sa nasambit nga lugar.
Sa impormasyon nga nakuha sang Radyo Bandera Iloilo, natigayon nga mabaklan ang subject person sang isa ka sachet sang suspected shabu nga nagabalor sang ₱23,500 bilang buy bust money paagi sa Police Poseur-buyer.
Narekober ang duha ka tied knot nga transparent plastic sang suspected shabu lakip na ang drug buy bust item nga may kabug-aton nga 105 gramos kag may standard market value nga ₱714,000.
Nahibaluan nga may kaso na si Nestor sang tuig 2015 may kaangtanan sa droga apang nakagwa ini sang tuig 2019.
Samtang ginpatigayon man ang nasambit nga operasyon, nalipong man ang magulang sang subject nga gilayon man ginkadtuan sang mga medical responders.
Magapangatubang naman ang arestado sang kaso sa paglapas sa Republiuc Act 9165 ukon ang Comprehensive Dangerous Drugs Act of 2002.
