ILOILO CITY— Dakop ang 38 anyos nga lalaki sa ginpatigayon nga drug buy bust operation sang Philippine Drug Enforcement Unit kag Dumangas Municipal Police Station.
Ang subject ang ginkilala nga si Jayson Junsay, kasado kag residente sang Brgy. Tamboilan, Dumangas.
Sa interview sang Radyo Bandera Iloilo kay Pmaj. Jogen Suegay, hepe sang Dumangas Muncipal Police Station, iya ginpahayag nga sang Pebrero lang nagsulod sa iligal nga buluhaton si Junsay kag padayon nila ini nga gina-monitor.
Nadakpan ang suspetsado sa ila mismo nga balay.
Nakuha sa subject ang apat ka sachet sang suspected shabu lakip diri ang drug paraphernalia.
Suno sa natungdan, ini ang nga tion nga nabaklan ang suspek.
Dugang pa ni Suegay, sa syudad sang Iloilo ginakuha sang suspetsado ang droga kag iya ini ginabaligya.
Makabig ang suspek nga Newly Identified Personality.
Samtang sa amu man nga operasyon, nagpatigayon sang search warrant sa iya nga balay sa diin nakuha ang isa ka daku nga plastic nga may unod sang binolto nga shabu, tatlo ka bilog nga plastic nga may unod sang suspected shabu kag 22 pistol shoulder nga armas.
Nakahunong na karon sa Dumangas Municipal Police Station si Junsay kag magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
