ILOILO CITY- Gin-aprobahan subong nga Lunes sang Senate Justice and Human Rights Committee ang hagna nga nagatuyo hatagan sang Filipino citizenship si American basketball player Justin Donta Brownlee.
Gin-aprobahan sang senate panel ang mga hagna isa ka semana matapos aprobahan man sang komitiba sa House of Representatives ang kasubong nga hagna.
Nagpahayag sang bug-os nga suporta si Senador Ronald dela Rosa nga isa man sa author sang isa sa mga hagna para sa naturalization sang two-time best import awardee sang Philippine Basketball Association bilang player sang Ginebra San Miguel.
Samtang ginpasalamatan ni Senador Sonny Angara ang mga kaupod nga senador sa pag-akto sa naturalization bill para kay Brownlee.
Para kay Senador Bong Go, co-author sa hagna ni Dela Rosa nga daku ang mabulig ni Brownlee sa Gilas Pilipinas para sa 6th kag final window sang FIBA World Cup Asiabn Qualifier nga natalana sa Pebrero 2023.
